ភ្នំពេញ៖ ក្នុងខែមីនា ឆ្នាំ២០២៣ កម្ពុជាមានជើងហោះហើរចេញ-ចូលកម្ពុជាចំនួន ២ ៤៦៤ជើង ដោយមានអ្នកដំណើរចេញចូលចំនួន ៣១៣ ០៦៧នាក់ បើធៀបនឹងខែកុម្ភៈ គឺកើនឡើង ១១%។

អ្នកនាំពាក្យរដ្ឋលេខាធិការដ្ឋានអាកាសចរស៊ីវិល លោក ស៊ិន ចាន់សេរីវុត្ថា បានប្រាប់ EAC news ឱ្យដឹងថា ក្នុងខែមីនាឆ្នាំ២០២៣ ក្រុមហ៊ុនអាកាសចរណ៍សរុបចំនួន ២៦ក្រុមហ៊ុនដែលបានប្រតិបត្តិការហោះហើរដឹកអ្នកដំណើរចេញចូលប្រទេសកម្ពុជា និងប្រទេសចំនួន១១។

លោកបញ្ជាក់ថា ក្នុងចំណោមក្រុមហ៊ុនដែលប្រតិបត្តិការហោះហើរអ្នកដំណើរចេញ-ចូលប្រទេសកម្ពុជាក្នុងខែមីនា គឺមានក្រុមហ៊ុនចំនួន៨ក្រុមហ៊ុនដែលដឹកជញ្ជូនអ្នកដំណើរចេញចូលកម្ពុជា-ថៃ ច្រើនជាងគេ គឺរហូតដល់ ៨៩០ជើង មានអ្នកដំណើរសរុបចំនូន ១០៣ ៣៧៨នាក់។ បន្ទាប់មកគឺជើងហោះហើរចេញចូលពីកម្ពុជា-ចិន ដែលមានជើងហោះហើរចំនួន ៤១០ជើង មានអ្នកដំណើរសរុប ៤១ ០៦៤នាក់។

បើតាមលោក ស៊ិន ចាន់សេរីវុត្ថា ក្រៅពីនោះមានក្រុមហ៊ុនអាកាសចរណ៍ដែលប្រតិបត្តិការហោះហើរចេញចូលកម្ពុជាក្នុងខែមីនា គឺក្រុមហ៊ុនមកពីប្រទេសកូរ៉េខាងត្បូង តៃវ៉ាន់ ហុងកុង ឡាវ សិង្ហបុរី ម៉ាឡេស៊ី ហ្វីលីពីន មីយ៉ាន់ម៉ា និងវៀតណាម។

គូសបញ្ជាក់ថា ក្នុងខែកុម្ភៈ ឆ្នាំ២០២៣ កម្ពុជាមានជើងហោះហើរចំនួន២ ១៣៤ជើង និងមានអ្នកដំណើរចំនួន ២៨៣ ០៩១នាក់ បើធៀបនឹងខែមករា គឺមានការកើនឡើង ដែលមានជើងហោះហើរចំនួន ២ ១០១ជើង និងមានអ្នកដំណើរចំនួន ២៧៥ ៨៩១នាក់៕